De Wäid is anderscht
De Wäid is anderscht – i kon des schpür`n
i brauch im Winter – iatz nimma frier`n.
De Jahreszeit`n – dean si voschiam,
weil scho im Januar – Boimkatzl bliahn.
De Wäid is anderscht.
De Wäid is anderscht – Raket`n fliang,
weil Diktatoren -nur Kriege führ`n,
de uns`re Herz`n – total zerstör`n,
des Wörterl Frieden – gar ned kapier`n.
De Wäid is anderscht.
De Wäid is anderscht – Mensch und Natur
fahr`n scho seit Jahren – neben der Spur.
Koa Miteinanda – koa Hand in Hand,
nur gegneinanda – des is a Schand.
De Wäid is anderscht.
De Wäid wead anderscht – i hob des Gfui,
daß koa Regierung – des ernsthaft ändern wui.
De Wäid wead anderscht – drum hoit ma zamm,
daß mia a moing no – a Freid am Leb`n ham.